يا توانسة راكم نصرة

بقلم نورالدين العيشاوي

1

صناديد  رجال بلادي

إذا غيّم الغيم و هبطْ بالغرّادي

و إذا اتـْلمّوا وحطّوا الدسائس غادي

يدحروا الظالم ويهتكوا الأعادي

زغردي عليهم بالله يا زينة البوادي

وقوليلهم بجاه ربي ردوا بالكم عليها

2

رجال الهمّة

ورتان والسّاحل وورغمّة

وبازلاس وماجر تتكمل اللمّة

صفاقس ومثاليها تزغرد وتنادي

الفراشيش والهمامة زاحوا على البلاد الغمّة

ووقفوا البلاد على رجليها

3

الكاف أهل العادة

باجة وجندوبة ورقادة

بنزرت ونابل وصيادة

نزلوا في رجيش بالعوادة

وهاهوما يرفعوا سيوفهم بالعالي

ويا ربي تحفظ الْتونس اُمّاليها

4

نحنا رجال الوهرة

بجنوبنا وشمالنا بالدشرة

نحنا ما تهزناش كان النصرة

وشمايلنا ما تحب الغدرة

والجريدي فينا إذا قلب الوزرة

لا عدت تفهم لا بايعها ولا شاريها...

5

البارح تونس اتباعت واليوم رديناها

وبروحنا ودمنا سقيناها

وإذا كان كمشة أوباش جحدوا فيها

نحنا بأكبادنا فديناها

واليوم والله ما نسلم فيها

لو كان تتقلب سافيها على عافيها

6

يا توانسة راكم نصرة

ارفعوا روسكم ويزي من الحقرة

بلادنا الكل دشرة دشرة

وزنقة زنقة وحفرة حفرة

عزيزة علينا الكل باسم العِشرة

وما فينا لا غاشي ولا براني

والكلنا بالخير ندعو ليها...

7

يا سواحلية فيقوا يزّيكم

يازلاس واهمامة واش بيكم

فراشيش وماجر يخليكم

راهو الماء يجري تحتكم وعليكم

وانتوما راقدين بالنوم على وذنيكم

وبلادنا اليوم بيها وعليها...