المَنْسِيِّيـن

*

هَذِي غْنَايَـة لِيهُمْ

مِ القَلْب تْحَيِّيهُمْ

اللِّي عَايْشِينْ لِينَا وْ لاَ رِيفْ وْ لاَ مْدِينَة

لَوْلاَ عْرَقْ إِيدِيهُمْ

وِ يْذُوبُوا كالـشَّمْعَة وِ يْخَبِّيوا الدَّمْعَة

عْلَى عْيُونْ أَهَاليهُمْ

النَّاسْ اللِّي تْعَاني وِ نْسَاتْهُمْ الأَغَانِي

هَذِي غْنَايَة لِيهُمْ

*

اللِّي عُمْرِي لِيهُمْ

وْعُمْرِي شْوَيَّة فِيهُمْ

يْعِيشُوا بْلُقْمَة نْظِيفَة وْيَصْنْعُوا بْخُطِّيفَة

رْبِيعْ يْجَنَّحْ بِيهُمْ

تِمْلِكْهُمْ بِكْلِيمَة وْ يِتْمَنَّاوْا , وْ دِيمَا

بْعِيدَة أَمَانِيهُمْ

النَّاسْ اللّي تْعَانِي وِنْسَاتْهُمْ الأَغَانِي

هَذِي غْنَايَة لِيهُمْ

*

اللِّي فِي لْيَالِيهُمْ

ضُحْكِتْنَا تْدَفِّيهُمْ

خَطْوِتْهُمْ عَ الجَمْرَة وْ يِحْلْمُوا بِالقَمْرَة

مْرَايَة بِينْ إِيدِيهُمْ

وْفِي آخِرْ لَحْكَايَة تِتْكَسَّرْ المْرَايَة

وْ مَا تَحْكِيشْ عْلِيهُمْ

النَّاسْ اللِّي تْعَانِي وِنْسَاتْهُمْ الأَغَانِي

هَذِي غْنَايَة لِيهُمْ

شعر آدم فتحي